மொழிகள் எவ்வாறு கற்கப்படுகின்றன?

மனிதகுல வரலாற்றில் மொழியின் பங்கு இன்றியமையாதது. தொடர்பாடலின் அடிப்படையாக மொழியே இருந்து வருகிறது. மொழிகள் எவ்வாறு கற்கப்படுகின்றன என்பது தொடர்பாகப் பல்வேறு ஆராய்ச்சிகள் காலத்துக்குக் காலம் மேற்கொள்ளப்படுகின்றன. பல கோட்பாடுகளும் முன்வைக்கப்பட்டுள்ளன.

மொழி உள்வாங்கப்படுதல் இரண்டு வகைப்படுகிறது.

1. முதல்மொழி

2. இரண்டாவது மற்றும் பிற மொழி

ஒரு குழந்தை அல்லது வளர்ந்தவர் இரண்டாவது மொழியைக் கற்பது என்பது ஒரு குழந்தை முதல் மொழியைக் கற்பதிலிருந்து வேறுபடுகிறதென்பதால் இவை தொடர்பில் தனித்தனியான ஆய்வுகள் மேற்கொள்ளப்படுகின்றன.

1. தாய்மொழி/முதல் மொழி

மனித வளர்ச்சியில் மொழியை உள்வாங்கிக் கொள்வது மிகக் குறிப்பிடத்தக்க ஒன்றாகும். குழந்தைகள் எவ்வாறு மொழியை உள்வாங்குகின்றன தொடர்பாக பல்லாண்டுகளாக மொழியியலாளர்களும் உளவியலாளர்களும் ஆராய்ந்து வருகின்றனர். எவ்வாறு குழந்தைகள் மொழியை உள்வாங்குகின்றன? சொற்களைக் கற்பதோடு நின்றுவிடாமல் அர்த்தமுள்ள வசனங்களை அமைக்க முடிவது எவ்வாறு? எளிமையான தொடர்பாடல் சாத்தியமாகையில் சிக்கலான இலக்கணமுடைய மொழியை உள்வாங்கத் தூண்டுவது எது?

இது தொடர்பான ஆராய்ச்சியில் முன்வைக்கப்படும் கோட்பாடுகளில் மூன்று பின்வருமாறு.

அ. வளர்ந்தவர்களைப் பின்பற்றி அவர்களது மொழியை மீண்டும் சொல்லி, பயிற்சி செய்து மொழி கற்கப்படுகிறது. இது 1940கள், 50களில் ஐக்கிய அமெரிக்காவில் பிரபலமாக இருந்த கோட்பாடாகும்

ஆ. குழந்தைகளிடம் இயற்கையிலேயே மொழியை உள்வாங்கும் ஆற்றல் உள்ளது. ஏனைய உயிரியல் அம்சங்கள் வளர்ச்சியடைவது போலவே குழந்தைகளின் மொழியும் வளர்ச்சியடைகிறது. இது நோம் சொம்ஸ்கி முன்வைத்த கோட்பாடாகும்.

இ. குழந்தையின் தனித்துவமான இயல்புகள், குழந்தையின் மொழிச் சூழல் ஆகிய இரண்டு காரணிகளின் தாக்கத்துடன் மொழி உள்வாங்கப்படுகிறது.

2. இரண்டாம் மொழி

இரண்டாம் மொழிக்கற்கை தொடர்பான கோட்பாடுகளும் முதன்மொழிக் கற்கை தொடர்பான கோட்பாடுகளுடன் நெருங்கிய தொடர்புடையவை.

அதாவது,

அ. மற்றவர்களைப் பின்பற்றிப் பயிற்சி செய்து கற்கப்படுகிறது,

ஆ. இயற்கையாக உள்ள உள்ளார்ந்த திறமையால் கற்கப்படுகிறது.

இ. கற்பவரது இயல்புகளும் மொழிச் சூழலும் கற்றலில் தாக்கம் செலுத்துகின்றன.

இவை தவிர மேலும் சில கோட்பாடுகளும் அண்மைக்காலங்களில் முன்வைக்கப்பட்டுள்ளன.

இரண்டாம் மொழியைக் கற்பது சிலருக்கு இலகுவாக உள்ளது தொடர்பிலும் ஆராய்ச்சிகள் மேற்கொள்ளப்பட்டுள்ளன. இரண்டாம் மொழியை ஒருவர் கற்பதில் அவரது வயது, கற்பதற்கான சந்தர்ப்பங்கள், கற்பதற்கான ஆர்வம், மொழியை உள்வாங்கும் தனிப்பட்ட திறமை போன்ற காரணிகள் தாக்கம் செலுத்துகின்றன.

(மொழி உள்வாங்கப்படுவது தொடர்பான பெருமளவு ஆங்கில நூல்களில் ஒன்று "மொழிகள் எவ்வாறு கற்கப்படுகின்றன?" (How Languages are Learned). இந்நூல் Patsy M. Lightbown, Nina Spada ஆகியோரால் எழுதப்பட்டு Oxford University Press இனால் வெளியிடப்பட்டுள்ளது. அதன் துணை கொண்டு சில தகவல்கள் இங்கே தொகுக்கப்பட்டுள்ளன)